LAVAMOS A CARA CON AUGA DE SAN XOÁN

Seguindo a tradición de San Xoán, o venres lavamos as nosas cariñas coa auga onde repousaron toda a noite as flores e herbas desta época 🌱🌳🌺🌷🌾🌿

RECOLLIDA DE FLORES E HERBAS DE SAN XOÁN

Na nosa vila, Carballo, festéxase o San Xoán 🔥🐟 É tradición lavar a cara o día 24 con auga na que repousaron herbas de San Xoán 🌿🌸🌻🌼No cole isto imos facelo o venres pero xa comezamos cos preparativos. Hoxe as nenas e nenos de Educación Infantil, fomos en busca de herbas e flores. Atopamos fiuncho, espadanas, malva, bilitroques, romeu... 

TRADICIÓN DE SAN XOÁN

E este venres, seguimos a tradición🔥🔥 Lavaremos a cara con auga de flores de San Xoán 🌿🌸🌻🌼

REVISTA "A VOZ DO SAN LUÍS" 2024/2025

Como cada ano, dende o Equipo de Dinamización da Lingua Galega editamos a revista "A Voz do San Luís" que recolle un pouquiño do vivido neste curso 2024/2025. Agardamos que vos guste!!

Feliz verán a todos/as!! 🌞 Vémonos de novo en setembro 💙

CONEXIÓN CARBALLO-RUS

Hoxe vivimos unha mañá emocionante, pois chegou o momento máis desexado: facer unha videochamada coas nenas e nenos de 4.º de Educación Primaria do CEIP Canosa-Rus💚

Agora que nos coñecemos, damos por rematado o proxecto "A nosa casa da vila" co que compartimos cartas, experiencias, aprendizaxes e ilusións ✨🌠

AUDIO DE MARUXA E CORALIA

Esta semana, as nenas e nenos de 5.º de Educación Infantil recibiron unha sorpresa. Atoparon na aula un pano, unha toca e un código QR. Cheos de emoción e intriga, escanearon o código. Sabedes que era? Un audio de Maruxa e Coralia!! 💙 Se queredes escoitalo, premede aquí.

Maruxa e Coralia son as mulleres que están detrás das cartas que recibimos de Landra. Ambas emigraron e volveron a Galicia, debatendo entre elas se era mellor vivir na vila ou na aldea. É así, que convidaron ao CEIP Canosa Rus a estudar sobre a aldea e a nós sobre a vila, chegando á conclusión de que ambas teñen aspectos moi positivos.

Como deixaron esquecido un pano e unha toca, aproveitamos para facer unhas fotos, empregando como fondo unha foto antiga da feira de Carballo.

CANTO PESAN E MIDEN AS VACAS?

Como sabedes, as nenas e nenos do colexio de Rus compartiron co noso alumnado de 5.º de Educación Infantil unhas vacas, uns animais propios da aldea. Coa finalidade de que coñecesen un pouco máis deles, enviaron un panel informativo en lingua galega, así como unhas vacas de cartón ás que poñerán un ubre feito cun guante para muxir 🐄

Dado o interese do alumnado polo tamaño e peso dunha vaca, empregando un metro e unha báscula, realizaron dous gráficos comparativos 👀

E ESTAS VACAS?

O venres na aula de 5.º de Educación Infantil, as nenas e nenos recibiron unha gran sorpresa nada máis chegar ao cole pois na súa aula había unhas vacas 🐄🐄 Que facían alí? Escaparían dunha granxa? Enviaríaas alguén?

Logo de moito pensar e buscar pola aula algunha pista que nos axudase a responder ás nosas preguntas, atopamos unha carta 💌 Todo aquilo enviábano as nenas e nenos do colexio de Rus 😍

CARTEIS INFORMATIVOS SOBRE CARBALLO

Na aula de 5.º de Educación Infantil, preparamos carteis informativos sobre diferentes lugares de Carballo para o que empregamos o croma. Seguimos aprendendo co proxecto "A nosa casa da vila".

MACROCONVIVENCIA "AO SON DA PANDEIRETA. VAI POR ELAS!"

O pasado luns 19 de maio, acudimos a Mens para celebrar as Letras Galegas xunto coas nenas e nenos do CRA Nosa Señora do Faro, Aspronaga e Lenda Educativa. 

Por que en Mens? Porque as pandeireteiras homenaxeadas naceron nesta parroquia de Malpica de Bergantiños.

Participamos en diferentes actividades:

💙Obradoiro de elaboración de pandeiretas - Espazo Pandeireteiras de Mens

💙Xogos inclusivos a cargo da Asociación Un paso máis - Espazo Eva Castiñeira

💙Merendola conxunta - Espazo Rosa e Adolfina Casás Rama

💙Foliada

💙Visita ao cemiterio e ofrenda floral onde están enterradas Prudencia e Adela

Queredes ver que ben o pasamos este día?

Grazas a todas as persoas que o fixestes posible, foi unha experiencia marabillosa 💙

COMPARTIMOS NOVOS MATERIAIS CO CEIP CANOSA-RUS

Seguimos co proxecto "A nosa casa da vila" e, desta volta, compartimos co alumnado de 4.º de Educación Primaria do CEIP Canosa-Rus novos materiais:

➜Un tractor 🚜, uns porquiños 🐖e unhas galiñas 🐔 para que usen mañá na romaría que farán no seu centro como produto final deste proxecto.

➜Unha carta con enlaces a diferentes vídeos 📽

➜Un memory con fotos antigas e actuais de Carballo.

➜Fotos sobre momentos vividos na aldea e que recollemos no Ecomuseo Forno do Forte de Buño cando acudimos de excursión cos nosos amiguiños e amiguiñas de Educación Infantil.

FELIZ DÍA DAS LETRAS GALEGAS

💙FELIZ DÍA DAS LETRAS GALEGAS 💙

As de Malpica son pescas,

as de Buño son oleiras,

as de Carballo modistas

e as da Brea panadeiras.

Bergantiños ten a sona,

Bergantiños a sona ten;

Bergantiños ten a sona

de cantar e bailar ben.

Velaquí vos amosamos a exposición que creamos na entrada do noso colexio:

• Cubo interactivo con imaxes das pandeireteiras e códigos QR que pemiten acceder a música tradicional.
• Caracterización dunha imaxe dunha muller con pano e toca, creando a súa falda con pequenos volantes informativos.
• Exposición dos carteis e guía didáctica elaborada polo CEIP Plurilingüe Celso Emilio Ferreiro de Cerceda e que resultaron gañadores do Concurso-Exposición Letras Galegas 2025.
• Cartel sobre a macroconvivencia que realizaremos o próximo luns en Mens e imaxes dos espazos que empregaremos.

PROXIMAMENTE PARA CONMEMORAR AS LETRAS GALEGAS

 

MONTAMOS O NOSO POSTO NA FEIRA

Dentro do proxecto "A nosa casa da vila", na aula de 5.º de Educación Infantil estivo e está a coñecer diferentes lugares da nosa localidade, Carballo.

Este xoves, visitaron a feira, onde aproveitaron para montar un posto de artesanía que eles mesmos/as elaboraron. Traballaron vocabulario en galego, interactuaron con persoas descoñecidas á hora de ofrecerlles produtos, contaron, sumaron, empregaron a calculadora, iniciáronse no manexo do diñeiro e incluso prepararon as súas propias ofertas!

PREPARÁMONOS PARA A FEIRA

Dentro do proxecto "A nosa casa da vila", seguimos estudando sobre Carballo. Desta volta, imos vivir nós mesmos como é vender na feira que se celebra cada xoves na Praza do Concello.

Preparamos chapas con frases e refráns en galego, bolsas con palabras referidas á nosa contorna, imáns para a neveira en forma de landra e folla de carballo... e máis cousas!! 😊

Queredes saber como elaboramos todos estes produtos que imos vender? Ollade este vídeo 👀

XOGO "ATÓPAME SE PODES!"

Dentro do proxecto "A nosa casa da vila", elaborouse o xogo "Atópame se podes" co que podedes coñecer diferentes tendas de Carballo e aprender/repasar vocabulario en lingua galega.

Nel empregamos pictogramas, unha ferramenta moi útil para aquelas persoas que precisan de apoio visual, sendo unha forma rápida e accesible de transmitir mensaxes sen necesidade de palabras.

Cada chaveiro agocha pictogramas cos produtos que ofrece a tenda. O teu reto? Atopar todos os pictogramas no menor tempo posible ⏰⌛

Ollade este vídeo para coñecer como se xoga 💡 

MATERIAIS SOBRE AS CANTAREIRAS E A POESÍA POPULAR ORAL

Como cada ano, para traballar sobre a figura homenaxeada no Día das Letras Galegas, contamos con numerosos materiais, entre eles os publicados na web O Portal da Lingua Galega. Unha mostra son os carteis e guía didáctica que se elaboran cada ano e que, neste 2025, se fixeron no CEIP Plurilingüe Celso Emilio Ferreiro de Cerceda 💙 Dende o noso centro, queremos enviarlles os parabéns!! 👏👏

CARTEIS 🎵

GUÍA DE ACTIVIDADES 📌

MARCAPÁXINAS📖

LETRAS GALEGAS 2025

LETRAS GALEGAS 2025

AS CANTAREIRAS E A POESÍA POPULAR ORAL

Chega o mes de maio, e con el o MES DAS LETRAS GALEGAS. Este 17, dedicaráselle ás cantareiras e á poesía popular oral.

Facendo clic nesta imaxe, accederedes a un Symbaloo con numerosos recursos para traballar nas aulas.

SAÍDA AO ECOMUSEO FORNO DO FORTE

O martes 22 de abril, o alumnado de Educación Infantil realizou unha saída ao Ecomuseo Forno do Forte en Buño, Malpica de Bergantiños.

• Coñeceron a labor dos oleiros, unha profesión tradicional onde realizan de xeito artesán pezas con barro.
• Participaron nun obradoiro de barro.
• Coñeceron e repasaron vocabulario variado en lingua galega, como: pía, cabazo, pote...
• Observaron imaxes antigas onde se podían observar, por exemplo, mulleres levando pezas de barro á feira de Carballo.

Aproveitarán esta actividade, para compartir imaxes co alumnado do CEIP Canosa-Rus, pois nelas pódese observar como era a vida na aldea fai anos.

MOKO (9 - 10 anos)

 

BOA SORTE (9 - 10 anos)

 

O TEMPO DO REVÉS (7 - 8 anos)

 

A CASA MÁIS ANIMADA DO MUNDO (7 - 8 anos)

 

O DRAGÓN COMEMEDO (4 - 6 anos)

 

UN DÍA DE TREBOADA (4 - 6 anos)

 

NUBE BRANCA QUERE SER ASTRONAUTA (4 - 6 anos)

 

A BRUXA REGAÑADENTES

 

A CASA DA MOSCA CHOSCA

 

A QUE SABE A LÚA?

PACO PAPÁN

 

CORRE CORRE, CABACIÑA

 

OS TRES PORQUIÑOS

 

COCORICO

 

SEMANA DO LIBRO

Como sabedes, o 23 de abril conmemórase o Día do Libro 📖 polo que aproveitaremos este blog para difundir libros ou vídeo-libros en galego.

Felices lecturas! 💗

ELABORACIÓN DE PIZZA E OBRADOIRO DE LUZ NEGRA

Lembrades que as nenas e nenos do CEIP Canosa-Rus, compartiron coa nosa aula de 5.º de Educación Infantil un pouco de fariña e un mural sobre o seu proceso de elaboración? Pois ben, remataron o trimestre facendo uso dela para elaborar pizza para merendar xunto cos seus amiguiños e amiguiñas das aulas de 3 e 5 anos 💖

Ademais, aproveitando que a través do proxecto "A nosa casa da vila" estiveron a estudar sobre as galiñas 🐔 e relacionándoo coa época da pascua onde son típicos os ovos, gozaron dun obradoiro de luz negra onde tiñan ovos pintados con pintura que brila con este tipo de luz e moitas outras propostas.

QUE APRENDEMOS SOBRE O FÓRUM?

Dentro do proxecto "A nosa casa da vila" sobre o que traballan este trimestre os nenos e nenas de 5.º de Educación Infantil, tamén estudaron sobre o FÓRUM CARBALLO. Ollade o vídeo para saber que é este edificio situado preto do noso colexio.

DÍA DA POESÍA E DÍA DA ÁRBORE

Como sabedes, o pasado 21 de marzo celebrouse o Día da Poesía e o Día da Árbore 🌳 polo que demos continuidade a unha actividade realizada en anos anteriores.

Recitamos poemas en galego, subímolos ao blog (podedes escoitalos facendo clic aquí) e xeramos un código QR que incluímos nos carteis que elaboramos. Estes, atópanse pendurados nas árbores da contorna do noso colexio para que todas as familias do centro e veciños de Carballo poidan gozar deles 💖

QUE APRENDEMOS SOBRE CHOCOLATES MARIÑO?

Dentro do proxecto "A nosa casa da vila" sobre o que traballan este trimestre os nenos e nenas de 5.º de Educación Infantil, tamén estudaron sobre CHOCOLATES MARIÑO, unha fábrica de chocolate da nosa vila onde aínda conservan o proceso tradicional de elaboración do chocolate 🍫

QUE APRENDEMOS SOBRE A TENDA DE MARINA?

Dentro do proxecto "A nosa casa da vila" que desenvolve o alumnado de 5.º de Educación Infantil, coñecen diferentes lugares de Carballo. Velaquí un pequeno vídeo sobre A TENDA DE MARINA situada preto do noso colexio.

RECIBIMOS NOVOS MATERIAIS DOS COMPIS DE RUS

Hoxe na aula de 5.º de Educación Infantil recibiron novos materiais dos compañeiros/as do CEIP Canosa-Rus, pois seguen a coñecer moitas cousas sobre a aldea e a vila.

Sabedes que lles enviaron desta volta?

🌿Unha carta

🌿Un mural sobre o proceso do millo e a elaboración da fariña

🌿Un carro feito coa impresora 3D

🌿Depresores para facer un acróstico coa palabra ALDEA

🌿Dous códigos QR:

• Un que enlazaba cunha obra de teatro sobre os animais da granxa onde os nenos e nenas se presentaban. Podedes acceder a ela facendo clic aquí.
• Outro que lles permitiu escoitar unha pequena pandeiretada que eles/as mesmos/as gravaron na radio. Podedes escoitala aquí.

Aquí podedes ver unha nube de palabras co vocabulario traballado:

EXPLICAMOS AOS NENAS E NENOS DE RUS COMO REXISTRAR O GALIÑEIRO

Estes días, na aula de 5.º de Educación Infantil puxéronse mans á obra para escribir unha nova carta aos compañeiros/as de 4.º de Educación Primaria do CEIP Canosa-Rus 💌 Nela contáronlles como poden rexistrar as galiñas, pois na súa aldea teñen galiñeiros 🐔

Ademais, aproveitaron para poñer unhas galiñas a chocar 🥚🐔🥚

COÑECEMOS O FÓRUM DE CARBALLO

Hoxe, as nenas e nenos de 5.º de Educación Infantil coñeceron un novo espazo da nosa vila, o Fórum, un edificio situado preto do noso colexio. Acudiron alí para axudar aos seus amigos/as do CEIP Canosa-Rus pois precisaban saber como podían rexistrar os seus galiñeiros 🐔

Landra aproveitou a ocasión para pedirlles que levasen a uns amiguiños/as seus 😊

FRAGMENTO DO POEMA "PARELLAS" DE GLORIA FUERTES

Fragmento do poema "Parellas" de Gloria Fuertes recitado polo alumnado de 4.º de Educación Infantil 🐝🐔

LEVAMOS AO BEE BOT DE PASEO POR CARBALLO

Na aula de 5.º de Educación Infantil, aproveitaron o BeeBot co que contan na biblioteca para facer unha actividade sobre Carballo. Desta volta, levaron á abelliña de paseo para que coñecese os diferentes lugares que están estudando

POEMA "EU BEN VIN" DE ROSALÍA DE CASTRO

Poema "Eu ben vin" de Rosalía de Castro no seu libro Cantares gallegos. Recitado polo alumnado de 3.º de Educación Primaria ao alumnado de Educación Infantil🦉

PREPARAMOS CHOCOLATES MARIÑO PARA COMPARTIR

Logo de estudar sobre a tenda carballesa Chocolates Mariño, as nenas e nenos de 5.º de Educación Infantil prepararon mostras de diferentes chocolates para compartir en familia 💖

🍫Chocolate en po

🍫Chocolate para tomar na man

🍫Chocolate á taza

🍫2 grans de cacao para ver como se lles quita a cascarilla

POEMA "O arco da vella" de Manuel María

Poema "O arco da Vella" de Manuel María no seu libro Os soños na gaiola. Recitado polo alumnado de 6.º de Educación Infantil 🌈

UNHA NOVA CARTA DIRECCIÓN RUS

Estes días na aula de 5.º de Educación Infantil estiveron elaborando unha nova carta para enviarlles ás nenas e nenos do colexio de Rus 💌 Aproveitamos para compartir con eles/as un libro titulado "A xente da miña aldea" pois atopárono na biblioteca e consideraron que podía ser interesante para eles/as. Ademais, elaboróuselles un carné para que poidan coller libros emprestados 📚

POEMA "O meu barco"

Neste audio poderemos escoitar o alumnado de 3º de Primaria recitando o poema "O meu barco" de Manuel María, recollido no seu libro Os soños na gaiola.

POEMA "Eu en ti"

Poema "Eu en ti" de Celso Emilio Ferreiro no seu libro O soño sulagado, recitado polo alumnado de cuarto curso de Educación Primaria.

POEMA "A primavera"

Poema "A primavera" de Antonio García Teixeiro no seu libro As catro estacións. Recitado polo alumnado de 5.º de Educación Infantil 🌷🌸🌹🌺🌻🌼

RECREAMOS UN MURAL DA RÚA VILA DE NEGREIRA (CARBALLO)

Dentro do proxecto de arte anual que desenvolven os nenos e nenas de 5.º de Educación Infantil e relacionado co proxecto "A nosa casa da vila", decidiron recrear un mural que se pode ver na rúa Vila de Negreira de Carballo, relacionándoo co Día do Amor. Este forma parte da iniciativa "Derrubando muros con pintura" do RexeneraFest 🎨

Podedes gozar del no edificio que teñen construído xunto á porta da súa aula 💛

FRAGMENTO DUN POEMA DE ANTONIO GARCÍA TEIJEIRO

Fragmento dun poema de Antonio García Teixeiro recitado polo alumnado de 5.º de Educación Infantil.🐦

POEMA "O neno e o xabarín"

Poema "O neno e o xabarín" de Xosé Lois García no seu libro A figueira lingoreteira. Recitado polo alumnado de 5.º de Educación Infantil.

BUSCAMOS UN CARBALLO NO PATIO

Seguindo co proxecto "A nosa casa da vila", as nenas e nenos de 5.º de Educación Infantil saíron ao patio en busca dunha árbore de carballo 🌳Para iso levar unha tablet pois hai moitas árbores e puideron empregar Google Lens para resolver dúbidas.

O que non sabían é que ía estar Landra agardándoos! Agora xa saben, quen lles estaba a escribir as cartas 💌

PRESENTAMOS CHOCOLATES MARIÑO

Na aula de 5.º de Educación Infantil seguen avanzando no seu proxecto "A nosa casa da vila" co que estudan sobre Carballo. Desta volta, coñeceron a tenda carballesa Chocolates Mariño 🍫

• Experimentaron canto pesa unha tableta de cacao en po.
• Buscaron en Google Lens sobre os grans de cacao.
• Uliron grans de cacao.
• Coñeceron ás persoas de Chocolates Mariño, asociando coa imaxe os catro nomes. Falaron sobre o papel de Teresa, Carmen e María como mulleres traballadoras merecedoras dunha mención especial porque o 8 de marzo foi o Día da Muller.
• Completaron o mural sobre esta tenda, coñecendo paso a paso o proceso de elaboración dunha tableta de chocolate.

SEGUIMOS OS MANDADIÑOS DA MADAMITA

Como sabedes, a meca deste Entroido no CEIP Xesús San Luís Romero disfrazouse de madamita. Cada día facíanos un mandadiño co que debiamos traer 🤡

2.ª CARTA RECIBIDA DO COLEXIO DE RUS

 Hoxe en 5.º de Educación Infantil recibiron unha nova carta dos nenos e nenas do CEIP Canosa-Rus💌 Que ilusión!!

Nela resolvíanlles a dúbida que lle formularan sobre unha folla 🌿 Contáronlles que era dunha árbore chamada carballo e que o seu froito eran as landras, que lles encantan aos esquíos e aos xabarís. É por isto, que lles enviaron para a aula unha miniatura feita coa impresora 3D 🐗

Tamén compartiron unha placa Micro:bit que tiveron que conectar ao ordenador para saber que sentiu o alumnado de 4.º de Educación Primaria ao recibir a nosa carta. Sentíronse ilusionados 😊

Aproveitando isto, leron o conto Xandra, a landra que quería voar 🐦

Seguen avanzando co proxecto "A nosa casa da vila!🏠

BINGO DE ENTROIDO

Lembrades os carteis que elaboramos sobre os entroidos típicos de Galicia? Pois na aula de 5.º de Educación Infantil aproveitáronos para aprender algúns dos seus nomes e incluso de comidas típicas desta época. Fixérono a través dun bingo que tivo moito éxito entre as nenas e nenos!

OBRADOIRO DE POESÍA

O pasado xoves 27 de febreiro, o alumnado de 2.º de Educación Primaria tivo a oportunidade de participar nun obradoiro de poesía ofertado polo Concello de Carballo.

Visitounos Dores, a autora do libro "O peizoque Roque", quen lle leu a súa historia. O paxariño protagonista do conto, sobrevivía a base de palabras polo que as nenas e nenos ían botándoas dentro del para alimentalo durante a lectura. Logo, cada un/unha foi escribindo e debuxando as palabras coas que lle gustaría dar de comer ao peizoque🐦

ESTREA DA DOCU-SERIE "UNHA VIAXE POLA VIDA DE ROSALÍA"

 Queredes ver como foi a estrea da docu-serie "Unha viaxe pola vida de Rosalía"?

🌺Organizamos a biblioteca para simular unha sala de cine.

🌺Preparamos flocos de millo para todos e todas.

🌺Organizamos dúas sesións: unha para o alumnado e o persoal do centro e outra para as familias.

Moitísimas grazas a todas as familias que vos achegastes á estrea da nosa docu-serie 💗 Para os que non puidestes vir, lembrade que podedes vela dende a casa facendo clic aquí.

Por outra banda, o equipo de biblioteca preparou unha escolma de libros sobre a autora e mercou un prato coa imaxe de Rosalía, unha figura moi importante que quixemos que tivese o seu lugar neste espazo polos valores que nos trasmite no referido á literatura oral, á lingua galega e como muller 💜 Este prato é obras dunha das olarías de Buño, oficio tradicional propio da nosa comarca que tamén estará presente no noso Entroido.