REVISTA ESCOLAR

Ao longo deste curso vivimos momentos inesquecibles cheos de aprendizaxes, esforzo, creatividade e convivencia. Como cada ano, editamos a nosa revista "A Voz do San Luís", onde cada fotografía recolle unha pequena parte das experiencias compartidas no noso colexio, nas excursións, nos proxectos e nas celebracións que nos fixeron medrar tanto a nivel académico como persoal. Estas imaxes son un recordo dos retos superados, das amizades fortalecidas e de todos os instantes que converteron este ano nunha etapa especial que gardaremos con agarimo na memoria 💖

🌞FELIZ VERÁN 🌞

TRADICIÓN DE SAN XOÁN

Como sabedes, chega unha das festas grandes de Carballo, a celebración do San Xoán🔥 Por este motivo, as nenas e nenos de Educación Infantil e Educación Primaria participaron nunha actividade para coñecer e vivir unha tradición galega como é a recollida de herbas de San Xoán 🌱🌿🌺🌾🌷e a preparación da auga para lavar a cara 💦💦

Así, tiveron a oportunidade de coñecer as plantas máis representativas desta época, explorando as súas cores, aromas e características. Despois da recollida, preparamos a auga de San Xoán para lavar a cara. Achegamos así ao alumnado ás nosas raíces, costumes e tradicións, fomentando o respecto polo patrimonio cultural, o contacto coa natureza e a aprendizaxe a través da participación activa e da experimentación.

PASEANDO POR GALICIA

O alumnado de 5.º de Educación Infantil estivo traballando, ao longo deste curso, no proxecto “Paseando por Galicia”, unha viaxe de aprendizaxe pola nosa terra na que descubriron a riqueza cultural, histórica e paisaxística que nos rodea.

Comezamos coñecendo a nosa contorna máis próxima, Carballo, investigando os seus lugares máis representativos e valorando o patrimonio que temos ao noso arredor. A partir desta primeira parada, continuamos a nosa viaxe por Galicia visitando e coñecendo as provincias de A Coruña, Lugo, Ourense e Pontevedra, achegándonos aos seus monumentos, tradicións, espazos naturais e elementos máis destacados.

Como peche deste proxecto, o alumnado elaborou un vídeo final no que recollen todo o aprendido e onde nos amosan os lugares que descubriron durante este “paseo” por Galicia.

Foi unha experiencia moi enriquecedora na que aprenderon, investigaron e traballaron en equipo, ao mesmo tempo que reforzaron o coñecemento e o orgullo pola nosa terra 💚

FOLIADA LETRAS GALEGAS

Rematamos a nosa Semana das Letras Galegas por todo o alto. As nenas e nenos de Educación Infantil e Educación Primaria participaron nunha fermosa foliada chea de música, alegría e tradición🎵🎵Tamén gozamos dunha merenda típica galega con pan, sardiñas en lata, chourizo, queixo e delicioso pan de ovo, poñendo así sabor e convivencia a unha celebración inesquecible das nosas raíces 💙

BREAKOUT SOBRE BEGOÑA CAAMAÑO

Esta semana das Letras Galegas veu cargadiña de propostas sobre Begoña Caamaño. O martes 12, o mércores 13 e o xoves 14 de maio, cada titoría participou nun breakout sobre a autora homenaxeada, axudando así á Biblioteca de Galicia a recuperar a información perdida 💙

🔐PROBAS DE EDUCACIÓN INFANTIL

🔐PROBAS DO 1.° CICLO DE EDUCACIÓN PRIMARIA

🔐PROBAS DO 2.° CICLO DE EDUCACIÓN PRIMARIA

🔐PROBAS DO 3.° CICLO DE EDUCACIÓN PRIMARIA

🔐COMO FOI A EXPERIENCIA?

🔐O PREMIO

CONCERTO DE NINGHURES

Onte tivemos a grandísima honra de recibir no noso centro a Hadrián, Tomé e Manuel, tres dos integrantes do grupo De Ninghures. Con eles coñecemos diferentes instrumentos musicais, practicamos algúns pasos da muiñeira e gozamos das súas fermosas cancións en lingua galega 💙

Ter no colexio un concerto dun grupo que canta en galego foi unha sorte enorme para nós. A música na nosa lingua fai medrar a cultura, une ás persoas e axúdanos a sentirnos orgullosos do que somos 🎵🎵

EXPOSICIÓN DAS LETRAS GALEGAS

Co gallo das Letras Galegas, temos instalada na entrada do centro unha exposición sobre Begoña Caamaño. Que podemos atopar nela?

💙Carteis gañadores sobre a autora homenaxeada.

💙Como Begoña Caamaño era locutora de radio, temos unha pequena exposición de dúas radios, unha máis antiga e outra máis moderna.

💙Exposición sobre o traxe galego onde se poden observar os nomes das súas partes e definicións segundo a Real Academia Galega.

MATERIAIS SOBRE BEGOÑA CAAMAÑO

Dende a aula de 3.º de Educación Primaria, comparten con nós un material creado coa ferramenta NotebookLM para traballar sobre Begoña Caamaño, unha voz imprescibdible. Agardamos que vos sexa de utilidade! 💜

COMO SERÁ A NOSA SEMANA DAS LETRAS GALEGAS?

A Semana das Letras Galegas no noso colexio preséntase como unha ocasión especial para achegar ás nenas e nenos á riqueza da nosa lingua e cultura dun xeito lúdico e participativo. Do 11 ao 15 de maio, gozaremos de numerosas actividades como:

🎵Un concerto didáctico co grupo De Ninghures.

🔑Un break out sobre Begoña Caamaño onde poñerán a proba o seu enxeño.

💃 Compartiremos a alegría dunha foliada.

Con estas propostas queremos non só celebrar as nosas letras e honrar á autora homenaxeada, senón tamén lembrar que o galego é unha lingua viva que debemos coidar, usar e reivindicar cada día do ano 💙

LIBROS VIAXEIROS COMPARTIDOS CO CEIP NOVO MESOIRO DE A CORUÑA

Este curso tivemos a oportunidade de crear tres libros cheos de apócemas, receitas e poemas cheos de imaxinación, aprendizaxe e ilusión. Como parte dunha experiencia en colaboración moi enriquecedora, compartimos estas creacións co CEIP Novo Mesoiro de A Coruña, co que fixemos un fermoso intercambio: nós enviámoslles os nosos libros e eles/as fixéronnos chegar tamén as súas obras 📚

Con esta actividade de intercambio de libros, aprender compartindo cobra todo o seu sentido, xa que o alumnado non só crea as súas propias historias e materiais, senón que tamén descobre e valora as doutros nenos e nenas, enriquecendo a súa aprendizaxe a través da colaboración e o intercambio de ideas.

Velaquí os nosos libros no CEIP Novo Mesoiro de A Coruña:

POR TI, BEGOÑA CAAMAÑO

Begoña Caamaño foi unha escritora e xornalista que amou contar historias diferentes, nas que as mulleres eran valentes, cursiosas e protagonistas das súas propias aventuras. Naceu en Galicia, traballou na radio e na televisión e tamén escribiu libros moi especiais nos que mesturaba a historia coas emocións e a imaxinación. 

Co gallo das Letras Galegas 2026, lembrámola como unha autora que nos invita a pensar, a facer preguntas e a descubrir o mundo con ollos atentos e corazón aberto.

Para traballar sobre a súa vida e obra contamos con materiais moi interesantes publicados na web O Portal da Lingua Galega. Unha mostra son os carteis e a guía didáctica que se elaboran cada ano e que este 2026 pertencen ao CEIP Plurilingüe Ribadavia (Ourense). Dende o noso centro, enviámoslles os nosos parabéns por tan fermoso traballo 👏🏆

💙💙💙💙💙💙💙💙💙💙

CARTEIS

GUÍA DIDÁCTICA

EXPOÑEMOS OS NOSOS LIBROS NA SEMANA DO LIBRO

O 23 de abril celebrouse o Día do Libro 📚 polo que as nenas e nenos de todo o centro tiveron a oportunidade de asistir a unha exposición dos libros creados a partir das propostas do EDLG. Cada un deles estaba acompañado dunha bandexa sensorial ou proposta interactiva.

📚Libro "Apócemas de Samaín" acompañado dunha bandexa de experimentación con trasbases de líquidos e ingredientes variados: cabazas, ollos, cogomelos, plumas... todo o necesario para crear as nosas apócemas!!

📚Libro "Receitas de Entroido", con proposta de ulido de canela ou esencia de anís, fariña e auga para facer masa e incluso un exprimidor para sacar zume ás laranxas e limóns, ingredientes imprescindibles para facer saborosas sobremesas no Entroido.

📚Libro "O noso libro poético" cunha proposta interactiva para ler poemas usando un cono de papel ou o micrófono, en voz alta, dando palmadas, con voz de enfado ou a toda velocidade!

INTERCAMBIO DE CARTAS

As nenas e nenos de 3.º de Educación Primaria están a intercambiar cartas co alumnado do seu mesmo curso do CEIP Wenceslao Fernández Flórez de A Coruña. Esta é unha actividade motivadora que lle permite iniciarse no texto epistolar de xeito práctico e significativo.

A través desta experiencia, as nenas e nenos melloran a súa expresión escrita en lingua galega, desenvolven habilidades sociais, aprenden a organizar as súas ideas e descobren o valor da comunicación coas demais persoas 💛

VISITA AO SALÓN DO LIBRO DE CARBALLO

A pasada semana foi a Semana do Libro e, como cada ano, nenas e nenos dos colexios de Carballo tivemos a oportunidade de visitar o Salón do Libro na Biblioteca Rego da Balsa. No caso das nenas e nenos de 6.º de Educación Infantil e 1.º de Educación Primaria, levaron a cabo dúas actividades:

📖Visita á exposición do Salón do Libro onde se inclúen materiais realizados nos diferentes colexios.

📖Concerto de Migallas Teatro.

XOGOS DE MESA EN GALEGO

Como sabedes, no mes de marzo as nenas e nenos de 6.º de Educación Primaria tiveron a oportunidade de gozar dunha actividade titulada "Recreos en galego" ofertada pola Secretaría Xeral da Lingua e impartido por Brazolinda.

Deixáronnos diferentes xogos de mesa en galego para o centro e, fai uns días, as nenas e nenos de 5.º de Educación Primaria empregáronos para aprender como se xoga a eles, traballar sobre o texto instrutivo... e todo isto en lingua galega! 💙

"Os xogos de mesa non só entreteñen, senón que crean espazos de encontro, aprendizaxe e comunicación" Reiner Knizia

INTERCAMBIO EN LINGUA GALEGA

A oralidade é fundamental porque a través da palabra as nenas e nenos constrúen o pensamento, expresan emocións e comezan a relacionarse co mundo que os rodea.

Hoxe na aula de 6.° de Educación Infantil fixeron unha videochamada co CEIP Novo Mesoiro de A Coruña para compartir aprendizaxes e vivencias en lingua galega. Durante a sesión presentáronse, explicaron os proxectos e investigacións que están levando a cabo ambas aulas... Foi unha experiencia xenial!! 💗

SEMANA DO LIBRO

 Como sabedes, este curso creamos tres libros:

🎃Libro de Apócemas: https://moitalinguasanluis.blogspot.com/2025/11/libro-apocemas-de-samain.html

🍪Receitas de Entroido: https://moitalinguasanluis.blogspot.com/2026/03/receitas-de-entroido.html

📚O noso libro poético: https://moitalinguasanluis.blogspot.com/2026/03/libro-poetico.html

Nesta Semana do Libro, están expostos na entrada do colexio con diferentes propostas interactivas.